મોવૈયા (પડધરી) ખાતે શ્રી ગુર્જર સુથાર જ્ઞાતિ દ્વારા આયોજિત ત્રિવિધ કાર્યક્રમ

પડધરી તાલુકાના મોવૈયા ગામ ખાતે શ્રી ગુર્જર સુથાર જ્ઞાતિ ગ્રામ્ય વિસ્તાર-મોવૈયા (પડધરી) દ્વારા આયોજિત ત્રિવિધ કાર્યક્રમ — શ્રી વિશ્વકર્મા દાદા મંદિરનો ૧૨મો પાટોત્સવ, શ્રી સરસ્વતી સન્માન સમારોહ તથા દાતાશ્રીઓનું સન્માન — તા. ૧૨ ડિસેમ્બર ૨૦૨૫, શુક્રવારના રોજ વિશ્વકર્મા દાદાની અસીમ કૃપાથી અત્યંત ભવ્ય, શાંતિપૂર્ણ અને હર્ષોલ્લાસભર્યા માહોલમાં સફળતાપૂર્વક સંપન્ન થયો હતો.

સવારે વહેલી સવારે ૬:૩૦ કલાકે ધ્વજારોહણ અને આરતી સાથે કાર્યક્રમનો શુભ આરંભ થયો હતો. સમગ્ર મંદિર પરિસરમાં ભક્તિભાવ અને આધ્યાત્મિક ઉર્જા છવાઈ ગઈ હતી. ત્યારબાદ સવારે ૭:૦૦ કલાકે હેમાદ્રી પુજનની વિધિ વૈદિક મંત્રોચ્ચાર સાથે સંપન્ન કરવામાં આવી હતી. બપોરે ૧૨:૦૦ કલાકે બિડું હોમવાનું વિધિ યોજાઈ હતી, જેમાં મોટી સંખ્યામાં જ્ઞાતિજનો તથા ગ્રામજનોએ ભાવપૂર્વક હાજરી આપી હતી.

બપોરે ૧૨:૩૦ કલાકે ભોજન પ્રસાદનું સુવ્યવસ્થિત આયોજન કરવામાં આવ્યું હતું. પ્રસાદ વ્યવસ્થા ભોજન પ્રસાદના દાતાશ્રીઓ શ્રી હર્ષદભાઈ બકરાણિયા (ઉપપ્રમુખશ્રી, શ્રી ગુર્જર સુથાર જ્ઞાતિ, રાજકોટ), શ્રી ઉમંગ એચ. બકરાણિયા (સાંજના મહાપ્રસાદના દાતા), તેમજ શ્રી નિરજભાઈ ધનજીભાઈ જાદવાણી અને શ્રી કિર્તનભાઈ કેતનભાઈ જમનાપરા (સ્પાઈન પોલીપેક – દેપાળીયા) દ્વારા કરવામાં આવી હતી. સ્વચ્છતા, વ્યવસ્થા અને સેવા ભાવના બદલ દાતાશ્રીઓની વિશેષ પ્રશંસા કરવામાં આવી હતી.

બપોર બાદ ૩:૩૦ કલાકે આમંત્રિત મહેમાનોનું સન્માનપૂર્વક સ્વાગત કરવામાં આવ્યું હતું. ત્યારબાદ સાંજે ૪:૦૦ કલાકે શ્રી સરસ્વતી સન્માન સમારોહ યોજાયો હતો, જેમાં શિક્ષણક્ષેત્રે ઉત્કૃષ્ટ સિદ્ધિ હાંસલ કરનાર વિદ્યાર્થીઓને સન્માનિત કરવામાં આવ્યા હતા. સમાજમાં શિક્ષણને પ્રાથમિકતા આપવા તથા આગામી પેઢીને પ્રોત્સાહિત કરવા માટે આ સમારોહ અત્યંત પ્રેરણાદાયી સાબિત થયો હતો.

સાંજે ૫:૦૦ કલાકે દાતાશ્રીઓનું સન્માન સમારોહ યોજાયો હતો. સમાજના વિકાસમાં આર્થિક, શૈક્ષણિક તથા સેવા ક્ષેત્રે યોગદાન આપનાર દાતાશ્રીઓનું શાલ, સ્મૃતિચિહ્ન અને માનપત્ર દ્વારા સન્માન કરવામાં આવ્યું હતું. સમાજ દ્વારા દાતાઓ પ્રત્યે વ્યક્ત કરાયેલ આદરભાવ અને કૃતજ્ઞતા સમગ્ર કાર્યક્રમનું વિશેષ આકર્ષણ બન્યું હતું.

આ ભવ્ય કાર્યક્રમમાં રાજકીય, સામાજિક તથા સહકારી ક્ષેત્રના અનેક મહાનુભાવો ઉપસ્થિત રહ્યા હતા. ટંકારા-પડધરીના ધારાસભ્ય શ્રી દુલર્ભજીભાઈ દેથરીયા, પૂર્વ ધારાસભ્ય શ્રી લલીતભાઈ કગથરા, રાજકોટ ડી.કો-ઓપ. બેંકના ડાયરેક્ટર ડૉ. ડાયાભાઈ પટેલ, જીલ્લા પંચાયતના સદસ્ય શ્રી ગીરીરાજસિંહ જાડેજા, તાલુકા પંચાયત પડધરીના પ્રમુખશ્રી શ્રીમતિ હેતલબેન રોહિતભાઈ ચાવડા સહિત અનેક રાજકીય આગેવાનો અને લોકપ્રતિનિધિઓ ને આમત્રણ આપવામાં આવ્યું હતું.

આ ઉપરાંત માર્કેટિંગ યાર્ડ રાજકોટના ડાયરેક્ટરશ્રીઓ શ્રી હઠીસિંહ જાડેજા અને શ્રી વસંતભાઈ ગઢિયા, તાલુકા ભાજપ પ્રમુખ શ્રી નિલેશભાઈ ડોડીયા, તાલુકા કોંગ્રેસ પ્રમુખ શ્રી મહિપાલભાઈ પાણ, આપ પડધરીના પ્રમુખ શ્રી દીપકભાઈ લીંબાસીયા, તાલુકા પંચાયતના સદસ્ય શ્રી મહેશભાઈ સુદાણી, પડધરી ગ્રામ પંચાયતના સરપંચ શ્રી વિજયભાઈ પરમાર તથા મોવૈયા ગ્રામ પંચાયતના સરપંચ શ્રી લલીતભાઈ રાઠોડ સહિતના મહાનુભાવોએ કાર્યક્રમમાં આમત્રણ આપવામાં આવ્યું હતું.

મુખ્ય મહેમાન તરીકે શ્રી ગુર્જર સુથાર જ્ઞાતિ, રાજકોટના પ્રમુખશ્રી શ્રી રસીકભાઈ બદ્રકિયા, અધ્યક્ષશ્રી શ્રી મુકેશભાઈ વડગામા, જામનગર જ્ઞાતિના પ્રમુખશ્રી શ્રી રમણીકભાઈ ગોરેચા, અમદાવાદના અગ્રણી ઉદ્યોગપતિ શ્રી ઘનશ્યામભાઈ વણોદીયા, વેજલપુરના પ્રમુખશ્રી શ્રી રમેશભાઈ તલસાણિયા, જુનાગઢના પ્રમુખશ્રી શ્રી રાજેશભાઈ કરગથરા, અમરેલીના પ્રમુખશ્રી શ્રી અરૂણભાઈ આદ્રોજા, રાજકોટના ઉદ્યોગપતિ શ્રી વિજયભાઈ ધ્રાંગધરીયા તથા અગ્રણી બિલ્ડર શ્રી કુમારભાઈ પંચાસરા ને આમંત્રિત કરવામાં આવ્યા હતા.

અનિવાર્ય સંજોગોને કારણે કાર્યક્રમના ઉદ્ઘાટક તરીકે નિર્ધારિત અગ્રણી ઉદ્યોગપતિ શ્રી કેતનભાઈ ગજજર (પોરબંદર) ઉપસ્થિત રહી શક્યા ન હતા, તેમ છતાં તેમના શુભેચ્છા સંદેશ દ્વારા કાર્યક્રમને પ્રેરણા મળી હતી. કેટલાક અન્ય આગેવાનો પણ કાર્યવ્યસ્તતાના કારણે હાજર રહી શક્યા ન હતા.

કાર્યક્રમનું સમગ્ર સંચાલન શ્રી નિતિનભાઈ બદ્રકિયા દ્વારા શિસ્તબદ્ધ અને સમયસર કરવામાં આવ્યું હતું, જેના કારણે કાર્યક્રમ સુવ્યવસ્થિત રીતે આગળ વધ્યો હતો. અંતે સાંજે ૬:૩૦ કલાકે મહાપ્રસાદ સાથે કાર્યક્રમનું ભવ્ય અને ભાવસભર સમાપન થયું હતું.

આ ત્રિવિધ કાર્યક્રમ દ્વારા શ્રી ગુર્જર સુથાર જ્ઞાતિની સંગઠન શક્તિ, શિક્ષણ પ્રત્યેની પ્રતિબદ્ધતા અને દાનશીલ ભાવનાનું સુંદર પ્રતિબિંબ જોવા મળ્યું હતું. આયોજક સમિતિએ દાતાશ્રીઓ, મહેમાનો, સ્વયંસેવકો અને ઉપસ્થિત સર્વે જ્ઞાતિજનોનો હૃદયપૂર્વક આભાર વ્યક્ત કર્યો હતો.